Akbar haye haye Akbar  

Haye jis waqt gira zeen say hamshakal e Payambar

Shabbir ko Zainab nay sada di yeh tarap kar

Akbar kay janazay pay mujhay lay chalo bhaiya

Hum mil kay utha lengy jawan laal ka lasha

Atthara baras walay ka sar goud mein lay kar

Mein naad e Ali parhti rahun gi ay baradar

Tum seena e Akbar say nikalo gay jo naiza   

Akbar kay janazay pay mujhay lay chalo bhaiya

Jo zakhm lagay hain woh dikhaye ga na tum ko

Shayad woh takalluf mein bataye ga na tum ko

Mein maa hun magar mujh say chupa hi nahi sakta   

Akbar kay janazay pay mujhay lay chalo bhaiya

Main jaanti hun kaisay jawan hotay hain betay

Aur dekhnay parr jayen agar un kay janazay

Ab main bhi samajh sakti hun aulaad ka sadma  

Akbar kay janazy pay mujhy lay chalo bhaiya 

Anay nahi dun gi main kisi ko bhi wahan par

Jee bhar kay galay milna jawan laal say ja kar

Main maut say keh dun gi zara dair thehar ja  

Akbar kay janazay pay mujhay lay chalo bhaiya  

Baba meray baba ki sada dey to raha hai

Awaz say lagta hai bahut dur gira hai

Lo hath mera thaamo bahut dur hai jaana  

Akbar kay janazay pay mujhay lay chalo bhaiya  

Us karb ki halat say nikaalay ga tumhen kon

Woh aerhiyan ragrayga sambhalay ga tumhen kaun

Chadar say bana lun gi main kuch dair ko parda

Akbar kay janazay pay mujhay lay chalo bhaiya  

Tooti hai kamar aap ki ay meray baradar

Gir gir kay uthen gay to hansen gay yeh sitamgar

Main aap ko ban’nay tou nahi dungi tamasha  

Akbar kay janazay pay mujhay lay chalo bhaiya  

Roti hai koi bibi musalsal pas e parda

Jab sy hai suna mir takallum tera noha

Bhai say galay mil kay behan boli dobara  

Akbar kay janazay pay mujhay lay chalo bhaiya