Baad e Ghazi qafila salar hay Zainab Hussain

Zulm se ab bar sar e pekar hay Zainab Hussain

Samnay zalim kay aesa azm aesa hosla

Fard hay kay lashkar e jarar hay Zainab Hussain

Ik rasan me bibiyan hain aur Sakina ka gala

Be rida hay sham ka bazar hay Zainab Hussain

Kya karay kese Sakina ko bachae shimr se

Kya karay ab bebas o lachar hay Zainab Hussain

Sheh ne jab Akbar kay marnay ki ijazat maa se li

Boleen Laila malik o mukhtar hay Zainab Hussain

Haibat e Ghazi jabeen pe hosla Sajjad ka

Ab tou misl e Haider e Karar hay Zainab Hussain

Ayi hay darbar me khaibar shikan ki laadli

Misl e Zehra faatahe darbar hay Zainab Hussain

Mutmaen rehty hain asim majlis o matam se hum

Bani e majlis hay aur zawwar hay Zainab Hussain