Bano ye Abid ko batla rahi hai

Meri Sakina ko neend aa rahi hai

Kehdo hawaon se aahista aayein

Kehdo parindo se ghul na machayein

Kehdo andheron se wapas na jayein

Jaagi hui chain kuch pay rahi hai

Shayad rasan ki aziyat hui kam

Madham karo bibiyon shor e matam

Sajjad zanjeer bolay na is dum

Shayad ghamo ki ghari ja rahi hai

Zindan ka dar ab zor se na kholo

Ay pehredaro ab aahista bolo

Tum bhi to jaage ho kuch dayr so lo

Baba ki khusboo isay aa rahi hai

Kay ab dharkan e dil bhi is pe giraan hai

Na bhai hay nazdeek na iskay maa hai

Kano se khoon go-kay ab bhi rawan hai

Magar aankh bojhal ye samjha rahi hai

Ye sham e ghariban ki jaagi hui hai

Tamachon kay darr se nahi so saki hai

Zara ab galay se rasan jo khuli hai

Sukoon se jo ab saans le pay rahi hai

Main khush hoon kay soeegi meri dulaari

Mai qurban is kay main ab is kay waari

Bohat seh chuki dukh ye Ghazi ki pyari

Magar nabz kuch aur batla rahi hai

Magar ye hua kya kay zindaan roya

Badan rooh kay saath bachi ka soya

Na jaagi wo Abid ne shana hilaaya

Aur ab maa ye kehte bhi sharma rahi hai

Kahan tak likhunga mai rehan noha

Kabhi shaam jaaun to dekhun wo rauza

Jahan qaidi bachi ka marqad hay tanha

Jahan maa abhi bhi kahay ja rahi hai