Bazar kay manzar ko aur apnay khulay sar ko bhooli nahi mai

Apnay bandhay haathon ko bemar kay zewar ko bhooli nahi mai

Uthti hui aandhi ko wehshat ko bayaban ko

Chhupty hue suraj ko tareeki ko maidan ko

Chaltay hue khanjar ko naizay pe tere sar ko bhooli nahi mai

Masoom Sakina ko barhty hue naizon ko

Ristay hue gaalon ko be rehm tamachon ko

Ristay hue kaano ko khinchty hue gohar ko bhooli nahi mai

Lehraty hue naiza haye shimr ka wo barhna

Aa aa kay mere peechay har bibi ka wo chhupna

Sholon me ghiray ghar ko chhinti hui chadar ko bhooli nahi mai

Jis raat me tanha thi us raat kay dhalnay ko

Tutay hue naizay ko us raat kay pehray ko

Bachon kay sisaknay ko aur raakh kay bistar ko

Yaad ajata hay ik maa ka wo khaak me dhans jana

Aur aag kay sholon me wo maa ka jhulas jana

Jaltay hue jhoolay se lipti hui madar ko bhooli nahi mai

Fizza ko mera bhai maa keh kay bulata tha

Dam uska mere bhai kay naam pe jata tha

Rutbay me jo maa ban kar ayi usi madar ko bhooli nahi mai

Ik chaand tha badli me chhupta tha nikalta tha

Parda dar e khaima ka uthta kabhi girta tha

Wo khaima Laila se haye rukhsat e Akbar ko bhooli nahi mai

Hay aaj bhi wo girya hay aaj bhi wo zaari

Hay aaj bhi patthar kay seenay se lahu jaari

Rotay hue pathar ko pathar pe rakhay sar ko bhooli nahi mai

Yaad aata hay dulhan ko ghash kis tarhan aye thay

Ik gathri Shah e waala jab kaandhon pe laaye thay

Us laash ki gathri ko us khoon bhari chadar ko bhooli nahi mai

Un shaam ki galion se jin se khulay sar guzray

Jis dar se guzarnay me thay soula peher guzray

Darbar kay us dar ko aur shamion kay shar ko bhooli nahi mai

Aati hay naved ab bhi awaz ye Zainab ki

Hay mujhko qasam sadion se sookhay hue lab ki

Pyasay Ali Asghar ko sukhay hue saghar ko bhooli nahi mai