Boli maa khasta jigar aakhri lori sunlo

Ay mere noor e nazar aakhri lori sunlo

Mera armaan meri jaan meri aas ho tum

Apnay maa kay liye Asghar nahi Abbas ho tum

Aaj ki raat ghanimat hay mere paas ho tum

Ay mere rashk e qamar aakhri lori sunlo

Sooni kar kay meri goudi mujhay tarpaogy

Chhor kar roti hui maa ko chalay jaogy

Aese jaogy kay wapas nahi aogy

Dur ka hay ye safar aakhri lori sunlo

Meri aaghosh me aakhri shab hay pyaray

Is tasweer se mere chaltay hain dil par aaray

Subha beh jaengy in me tere khoon kay dhaaray

Tujhko aegi qaza aakhri lori sunlo

Kal sar dasht e bala hoga qayamat ka saman

Tum khuda janay kahan hogy kahan hogi ye maa

Raakh reh jaegi kal aaj ye khaimay hay jahan

Kal ujar jaega ghar aakhri lori sunlo

Keh rahay thay abhi haye Shah e karbobala

Qatl hojaegi is dasht me kal fauj e khuda

Ay mere laal larazta hay kaleja mera

Raat jae na guzar aakhri lori sunlo

Hashr ka lamha tha gauhar wo qayamat ki ghari

Karwaten leta tha shehzada tarapta tha kabhi

Dard me doobi hui sun kay sada madar ki

Agaya waqt e safar aakhri lori sunlo