Asr ka waqt hai shabbir ki aati hai sada

Chur zakhmo se badan hogaya amma mera

Apni aagosh may ab mujko chupalo amma

Arey dhoop hai apni abaa aan ke dalo amma

Garm reti pa main girta hun sambhalo amma

Thak gaya lashay utha kar mai bharay lashkar ki

Laash Qasim ki mai laaya tha kabhi Akbar ki

Khud banayi thi lahad maine Ali Asghar ki

Do tasalli mujhe seene se lagalo amma

Taygh talwaron se, khanjar se badan zakhmi hai

Khaak jalti hai to zakhmo may chubhan hoti hai

Mere zakhmo se mere dil ka lahoo jaari hai

Apni chaadar ko mere zakhmon pe daalo amma

Mera Abbas khafa hogaya amma mujhse

Wo nahi aaya utha laaya tha baazu uske

Aap ek kaam karay nehr kanare jaake

Mere roothe huwe bhai ko manalo amma

Chakkiyan peesi hai goudi may bitha kar mujhko

Jaagti rehti thi zaanu pe sulaa kar mujhko

Loriya deti thi jhoolay may jhula kar mujhko

Ek dafa goud may phir apni sula lo amma

Aur kuch dayr ka mehmaan hun tum paas raho

Rayt zakhmo may hai aanchal se usay saaf karo

Aati hai rone ki aawaz e Sakina dekho

Jao tum jaake Sakina ko sambhalo amma

Dekho wo aag lagi sham e ghariba aayi

Dekho ghabra ke nikal aayi meri maajayi

Dekho behosh Sakina ka para hai bhai

Jao Sajjad ko sholon se nikalo amma

Hai guzarish meri tumse to ab itni maadar

Amma baba ki kasam dhaanp lo mu par chadar

Dekha jayega na ab tumse ye khooni manzar

Qatl hota hun nigahon ko hata lo amma

Hogi jab hashr ke maidan may majlis barpa

Farsh e gham Sheh ka bichaengi janab e Zehra

Aayegi hazrat e Shabbir ki Rehan sadaa

Aaj jee khol ke tum ashk bahalo amma