Ghar laut kay ghar me pehla diya kis tarhan jalaya Zainab ne

Bas aah bhari aur ghut ghut kay beton ko pukara Zainab ne

Phir koi hook utthi dil se phir shaam e ghareeban yaad ayi

Hujron me Aun o Muhammad kay dekha jo andhera Zainab ne

Kis tarhan se Zainab aur Sughra ik dusray ko pehchanengi

Sughra kay baal safaid hue kiya kaala jora Zainab ne

Ghash anay se pehly dono ne ik doojay ko bas thaam liya

Sughra ne jo dekha Zainab ko Sughra ko jo dekha Zainba ne

Ik shor utha ujray ghar me haye Akbar haye Asghar

Sughra ne smbhala Zainab ko Sughra ko smbhala Zainab ne

Bhai ki yaad me jeetay jee aankhon se bahaya ik darya

Beton ki yaad me jeetay jee ansu na bahaya Zainab ne

Nabion ki waris kay waris ki amanatdaar behen thi naved

Tauheed kay baar ko shaanon par tanha hi uthaya Zainab ne