Maula maqtal may sar ko jhukaye

Laash e Akbar pe tanha kharay hain

Dheeme dheeme tapakte hain aansu

Haye Sughra ka khat parh rahe hain

Bolay kya mai jawab is ka dun

Haye Sughra bata kya likhun

Mai to pardes may lut gaya

Apne lashkar ko mai ro chuka

Tera baba ghareeb hogaya

Aur iske siva kya likhun

Aandhiya mera ghar legayi

Mere lakht e jigar legayi

Mera noor e nazar legayi

Aur iske siva kya likhun

Khat tera ab sunaun kise

Kaun meri sada par uthe

Shab ko jaage huve sogaye

Aur iske siva kya likhun

Haye Sughra wo bhai tera

Jisne tujhse tha wada kiya

Kha gayi usko karbobala

Aur iske siva kya likhun

Pyar tune tha jisko likha

Ghutniyo bhi jo na chal saka

Haan wo Asghar bhi ab na raha

Aur iske siva kya likhun

Shab ko dulha banaya jise

Raas aayi na mehendi jise

Royi sehre ki ladiyan jise

Aur iske siva kya likhun

Ab Sakina ka hafiz khuda

Waqt Zainab pe bhi hai kara

Mujhko ghere huve hai qaza

Aur iske siva kya likhun

Ye to accha huva laadli

Apne ghar may hi tu rehgayi

Be ridayi se tou bachgayi

Aur iske siva kya likhun

Khat wo rehaan o sarwar tha kya

Khaak se mera maula utha

Laash e Akbar pe khat rakhdiya

Aur iske siva kya likhun