Sakina mar gayi zindan may jab ye shor utha

Alam se zard tha us dam har ek ka chehra

Qareeb e laashay e humsheer bhai jab pahuncha

Bandhe thay haath badan tauq se larazta tha

Na uth saka jo janaza behan ka bhai se

To roke bete se Sajjad phir ye kehne lagay

Kar madad meri Baqir beta hamsheer ki qabr banaun main

Zanjeer uthao tum meri aur uski laash uthaun mai

Dada ne bari mazloomi may tha dadi ko dafnaya

Lekin wo madina tha Baqir aur ye hai des paraya

Is char baras ki Zahra ko ghurbat may kahan dafnaun mai

Jo khoon se bhari thi maadar ki nazron se chupadi maine

Ek laash thi jo gardan may rassi wo hatadi maine

Gardan pe banay jo rassi se kaise wo neel chupaun mai

Miljaye agar wapas mujhko wo teri rida aur gowhar

Baba ki lehad par rakhdoo ya Sughra ko dun wapas jaakar

Wo dono amanat hai teri batlade kisay pahunchaun mai

Jab tumko rehaai miljaye phupiyon ko watan pohnchana

Reh lenge yahin ghamkhwari behan tum qaafila ghar le jaana

Dafnaate huye is bachi ko zindan may agar mar jaun mai

Dono ko juda mai kaise karun himmat hi nahi ye meri

Aap ke sar se lipti hui bejaan ye aap ki beti

Kya saath Sakina ke baba sar aap ka bhi dafnaun mai

Taweez e lehad ko band kiya Abid ne ye kehkar Akbar

Kehna ye haram se ay Baqir sab roye yahan par aa kar

Turbat pe chirakne ki khaatir ab pani kahan se laaun mai