Kehti thi ye maa khoon bhari mayyat se lipat kar

Haye haye Ali Akbar

Tum marr gye aur zinda rahi madar e muztar

Haye haye Ali Akbar

Armaan tha pehnaungi poshaak shahani

Afsos kay raas ayi na tujhko ye jawani

Kesa tha muqaddar haye haye Ali Akbar

Itna tou zara thehro tumhen dulha bana lun

Bas aik jhalak sehray ki Sughra ko dikha lun

Bechen thi khuahar haye haye Ali Akbar

Atthara (18) baras paal kay parwaan charhaya

Wo gaisuon wala hay mera khoon me nahaya

Ye kya hua dilbar haye haye Ali Akbar

Maa teri judayi me bhala kese jiyegi

Marr jaegi Sughra jo khabar teri sunaygi

Ab kya karun jee kar haye haye Ali Akbar

Thehro kay mai attharween mannat tou barha dun

Phir le kay balaen tujhay jeenay ki dua dun

Sadqay ho ye madar haye haye Ali Akbar

Pehly tou ik awaz pe uth jatay thay beta

Ab itni sadaon pe bhi pehlu nahi badla

Kya hogaya dilbar haye haye Ali Akbar

Tum hichkiya le le kay jo dum torr rahay ho

Mu'n maa se hamesha kay liye morr rahay ho

Kyun roothay ho dilbar haye haye Ali Akbar

Aaen jo hamen lootnay khaimay me sitamgar

Maa daygi sadaen Ali Akbar Ali Akbar

Chhin jaegi chadar haye haye Ali Akbar

Jab koi jawaan laash nazar aati hay mehshar

Ik yaad suay karbobala jaati hay mehshar

Dil rota hay keh kar haye haye Ali Akbar