Main jahan jaun mere andar basi hai Karbala

Ban ke dharkan mere dil mein goonjti hai Karbala

Main jahan jaon mere andar basi hai Karbala

Mere seene mein azal se bas raha hai ya Hussain

Yeh jo dharkan ki musalsal ik sada hai ya Hussain

Har ghari aawaz mujh ko de rahi hai Karbala

Goonjtay hain ya Hussaina se musalsal baam o dar

Chaudah sadiyon se hai jaari Sheh ke matam ka safar

Iss tarha seena ba seena chal rahi hai Karbala

Maa ne dikhlaya hai rasta farsh e majlis ka humein

Halqa e matam mein le kar aaye hain baba humein

Goud se maa baap ki hum ko mili hai Karbala

Sham o kufa ke safar mein beriyaan thamay rahi

Tauq ka bosa kabhi zanjeer ka bosa kabhi

Abid e beemar se lipti hoi hai Karbala

Taziyane khaye gi himmat magar dikhlaye gi

Sham tak mazloom ka paigham le kar jaye gi

Sheh ki maiyyat se qasam kha kar uthi hai Karbala

Sabar walay taza dam hain zulm walay thak gaye

Khanjaron ne haar mani nezay bhaalay thak gaye

Pichey hatney ki jaga aagay barhi hai Karbala

Hai kahin Akbar jawaan ka sar kahin besheer ka

Sar buredah hai kahin Abbas ka Shabeer ka

Nok e naiza pe safar karti rahi hai Karbala

Bekafan us Syed o sardar par lakhon salam

Aik din ho ga takallum us ke khoon ka inteqam

Muntazir Ibn e Ali ki aaj bhi hai Karbala