Jab khatima ba khair huwa fauje shah ka

Kausar pe qafla gaya pyasi sipaah ka

Ghar lut gaya janab e Risalat panaah ka

Khaak ur rahi thi haal ka ye bargaah ka

Haye maqtal may aayi Fatima Zehra ba-rehna sar

Chillaeen zere taygh hai baba mera jigar

Unnees sau hain zakhm tan-e-chak chak par

Zainab nikal Hussain tarapta hai khaak par

Haye phonchi behan jo bhai ke maqtal may nohagar

Dekha sar e Hussain hai naize ki nok par

Sadqe gayi luta gaye ghar wada gaah may

Haye jumbish labon ko hai abhi zikre Elaah may

Mera wada huwa pura nana

Mai nok e sina par hun

Nana dekho nawasa kahan aagaya

Maine karbobala ko mualla kiya

Khoon mera aaj khaak e shifa ban gaya

Maine bachpan ka wada wafa kar diya

Mera ghar mere bache meri zindagi

Aap ke deen pe sab maine qurban ki

Mere maathe pe bosa do ab aakhri

Bar sare nok e naiza sawari chali

Deen o Quran bache tera kaaba bacha

Ta qayamat rahegi azan ki sada

Madresa ban gayi aaj se karbala

Haye nana magar mera ghar na raha

Chakkiyan peesne wali maa ki qasam

Meri aaghosh may tora Akbar ne dam

Kaise laashe jawan laaya suye haram

Apne wade pe sehta raha gham pe gham

Kitne laashe uthaaye hain ek roz may

Kitne aansu bahaye hain ek roz may

Saikron teer khaye hain ek roz may

Saare waade nibhaye hain ek roz may

Bhai battees barson se jo saath tha

Maine wada nibhaane may wo khodiya

Khagayi uske shanon ko ye alqama

Wo gaya aur dard e kamar degaya

Mere nana ye dulha ye kamsin jawan

Aise raunda gaya dasht may al amaan

Apne bete ko pehchan paayi na maa

Uski dulhan ne khud tordi churiyan

Han wo Asghar jo Sughra ki thi zindagi

Jis ki khaatir wo bemaar bachi meri

Chote chote se kurte jo seeti rahi

Uska khoon apne chehre pe mal ke abhi

Mere nana Sakina ka gham dekhiye

Umr itni si itne sitam dekhiye

Jalti reti pe uske qadam dekhiye

Kitne majboor hain aaj hum dekhiye

Shaam rehan o sarwar jo dhalne lagi

Sar se Shabbir ke ye sada aati thi

Ay behen ab yahan se qayadat teri

Mere waade ki khaatir zuroori huwi