Na mehmil hai na haudaj hai

Na lashkar ki wo sajdhaj hai

Na sar pe alam na chadar hai

Allah ye kaisa manzar hai

Musafirane musibat watan may aate hain

Safar se aate hai saughate dard laate hain

Kiya salam Mohamed ke aastane ko

Luta ke aaye hai Zehra ke sab gharane ko

Na kar qubool tu hum bekaso ke aane ko

Ye noha karte hai aur ashk khoon bahate hain

Madina hum tere waali ko aaye hain kho kar

Madina koofe may sar nange hum phire dar dar

Madina daaghe rasan hai hamare shano par

Utha ke haath madine ko ye sunate hain

Har ek qadam hai buka kab labon pe bayn nahi

Hum aaye zinda par Zehra ka noor e ayn nahi

Madina Akbar o Qasim nahi Hussain nahi

Ye kaise kaise jawan thay jo yaad aate hain

Madine walon kaho us behan ki kya taqdeer

Jo dekhe apne biradar ke halq par shamsheer

Lahoo may ghark jo dekhe Hussain ki tasveer

Lahoo may kya yunhi bhai ka sar dikhate hain

Batao kahte hai kya sab us amma jayi ko

Jo arbaeen talak de kafan na bhai ko

Behan dikhayegi moo kis tarha khudayi ko

Kafan diya hai na unki lehed banate hain

Chala basheer ye deta huwa khabar har ja

Magar mehellaye hashim may dekhta hai kya

Ke ek mareeza sare raah hai khari tanha

Hai muntazir ke wo kunbe ke log aate hain

Khabar ye phaili to matam har ek ghar may huwa

Nikal nikal pari sab auraten barehna pa

Giri zameen pe Sughra ke uspe charkh gira

Jo sougwar hain Sughra ke paas aate hain

Fiza e dard may lekar udasiya aayi

Safar se lut ke idhar bhooki pyasian aayi

Utho Rasool tumhari nawasiya aayi

Ke khud ko oonto se ehle haram ghirate hain

Jo aayi kaan may awaaz e Bano e muztar

Kahan ho ay mere waali imam e jin o bashar

Tarap ke rehgayi Sughra bapa huwa mehshar

Dabir bas ke ab aflaak thar tharate hain