Jab khaimay main ruqsat ko shah-e-bahrobar ae

Chillayi Sakina mere bekas padar ae

Sheh kehte thay bibi hamay ro kar na rulao

Phir pyar kare hum tumhe mu aage ko lao

Wo kehti thi humraah mujhe lay kay to jao

Mai kya karoon maidan may gar jaa kay na aao

Neend aayegi jab aap ki bu paaungi baba

Mai raat ko maqtal may chali aaungi baba

Farmaya nikalti nahi syedanian bahar

Senay pe sulayengi tumhe raat may madar

Kyun kehti ho maqtal may chali aaungi baba

Mai raat ko maqtal may chali aaungi baba

Nanhe se kalejay pay mere chalti hai talwaar

Khulta nahi kyun aap nay baandhe hai yeh hathyar

Mai aapko kho kar na kabi paaungi baba

Mai raat ko maqtal may chali aaungi baba

Aati hai bala sar pe to pehle mujhe varo

Mar jaungi baba na sidharo na sidharo

Jaoge jahan mai bhi wahin jaungi baba

Mai raat ko maqtal may chali aaungi baba

Shab hogi to phir khaak pe soyenge kahan aap

Seene pe to Asghar ko sulayenge wahan aap

Acha mai wahin khak pe so jaungi baba

Mai raat ko maqtal may chali aaungi baba

Aane do agar pyaas se ghash aayega baba

Tum jeetay raho pani bhi mil jayega baba

Mai aap ko dekhungi to jee jaungi baba

Mai raat ko maqtal may chali aaungi baba

Kuch door na thay hum ke tumhe neend na aayi

Kya hovega jab hogi mahino ki judaai

Bibi na kaho mai nahi so paungi baba

Mai raat ko maqtal may chali aaungi baba

Wo haal anees ab nahi ho sakta hai marqoom

Jis tarha chuti baap se wo dukhtare mazloom

Noha tha yehi jis ka na jee paungi baba

Mai raat ko maqtal may chali aaungi baba