Pehlu bhi shikasta hai turbat bhi shikasta hai

Kya haal ye ummat ne Zehra ka banaya hai

Khatoon koi gham se yun choor nahi dekhi

Aisi kioi dunya me mastoor nahi dekhi

Atthara baras may hi lagti jo zaeefa hai

Darbaar may zaalim ne ki aisi pazeerayi

Kis tarha se tu bibi phir laut ke ghar aayi

Baalon ki safedi ne sab haal sunaya hai

Tu roti rahi ghar may Haider se bhi chup chup ke

Ismat ki tarha dukh bhi parde may rahe tere

Kuch dard tere bibi bas jaanti Fizza hai

Do aise janaze hain tareekh may jo utthay

Bas ghar ke hi logon ne dono ko diye kaandhe

Ek Fatima Zehra hai ek bali Sakina hai

Marham tere zakhmo ka bibi na mila ab tak

Aulaad e umayya ki baaqi hai jafa ab tak

Rone pe bhi pehra tha turbat pe bhi pehra hai

Mismaar tera rauaza ummat ne kiya jab se

Baba tera rehta hai turbat pe teri tab se

Kab gumbad e khizra may baba tera rehta hai

Mehdi se koi pooche kya uspe guzarti hai

Awaaz baqayya se jab rone ki aati hai

Aankhon se lahoo rokar wo bhi yehi kehta hai

Tasveer haqeeqat ki khwabon ko bana dije

Ay bibi takallum ko tabeer dikha dije

Matam teri turbat pe hote hue dekha hai