Ya Hussain ya Hussain ya Hussain

Nehren rawan hain faiz e Shah e mashraqain ki

Pyason piyo sabeel hai nazr e Hussain ki  

Naam e Maula pay hain pani jo pilanay walay

Han yehi log hain firdous mein janay walay

Naam e Maula pay hain pani jo pilanay walay

Sirf Shabbir ka dar hai jo yeh phailaye hain hath

Warna yeh log kahan maang kay khanay walay  

Naam e Maula pay hain pani jo pilanay walay  

Teri raahon mein bichhaen gay farishtay aankhen

Farsh mazloom ki majlis ka bichanay walay  

Naam e Maula pay hain pani jo pilanay walay

Farwa deti hain duaen sadaa abaad rahen

Ro kay mehendi mere Qasim ki uthanay walay

Naam e Maula pay hain pani jo pilanay walay

Haath utha kar tujhay detay hain dua Hurr e jari

Paon Shabbir kay zaair kay dabanay walay

Naam e Maula pay hain pani jo pilanay walay

Do katay haath tujhay girnay nahi dengy kabhi

Chhotay hazrat ka alam ghar pe laganay walay

Naam e Maula pay hain pani jo pilanay walay

Hay yaqeen khuld me wo jaengy sab se pehlay

Rassiyan thamay juluso'n ko chalanay walay

Naam e Maula pay hain pani jo pilanay walay

Aik guzarish hay kay Abbas kay lashay pe na jaa

Chadar e Zahra ko naizay pe uthanay walay

Naam e Maula pay hain pani jo pilanay walay

Dar e zindaan pay bethi hai Sakina uth ja

Shahzadi tere baba nahi aanay walay  

Naam e Maula pay hain pani jo pilanay walay

Shah kehtay thay ke jao Ali Akbar jao

Hum nahi lasha e Abbas say janay walay

Naam e Maula pay hain pani jo pilanay walay

Akhri waqt bhi aayi nahi saaye mein Rabab

Aisay dekhay na kahin waada nibhanay walay  

Naam e Maula pay hain pani jo pilanay walay

Ban’nay kab detay thay zindan say bahir turbat

Neel chehray pay Sakina kay bananay walay

Naam e Maula pay hain pani jo pilanay walay

Kya ijazat hai takallum bhi tery saath chalay

Qabr e Zahra pay diya jaa kay jalanay walay  

Naam e Maula pay hain pani jo pilanay walay