Haye Hussain  Haye Hussain

Shimr ne gardan e mazloom pe khanjar jo rakha

Kuch qadam dur say deti rahi Zainab ye sada

Aakhri baar bahen choom le bhai ka gala

Shimr khanjar na chala

Teer jee bhar kay isay maar chuka hay lashkar

Barchhiyan pehlu me tooti hain sitam aur na kar

Khud hi aa jayegi kuch der mein bhai ko qaza

Shimr khanjar na chala

Minnaten karti hun zalim teri aisa tou na kar

Asr kay waqt mere ghar me andhera tou na kar

Shaam se pehle bujhaata hai charagh e Zahra

Shimr khanjar na chala

Sun ke halmin ki sada aayi hai rann me bachchi

Chal na jaaye kahin donon pe layeen teri chhuri

Dekh bhai ke galay par hai Sakina ka gala

Shimr khanjar na chala

Dekh sakta nahi tu jo nazar aata hai mujhay

Wasta deti hun Tatheer ki aayat ka tujhay

Haath amma ne hai Shabbir ki gardan pe rakha

Shimr khanjar na chala

Kaat kar sajde mein akbar Shah e wala ka gala

Shimr hansta hua Shabbir ke seene se utha

Goonjti reh gayi maqtal mein ye Zainab ki sada

Shimr khanjar na chala