Din tha ashoor ka Shabbir pe tanhayi thi

Har taraf girya o matam ki ghata chayi thi

Ek barat kisi dulha ki wahan se guzri

Naam naushah ka mehzar main tha wehab-e-kalbi

Ruk gaya dasht main ek saneha aisa dekha

Haath se kangna gira sar se zameen par sehra

Wehab-e-kalbi ne kaha kiskay hay farzand janab

Bolay Shabbir hay khatoon e jinah maa ka khitaab

Baap mera hay Ali nana Nabi e do sara

Wehab-e-kalbi ka ye sunte hi badan kaanp gaya

Rokay Shabbir se kehta tha ye Wehab-e-kalbi

Zindagi aap pe sadqe meri farzand e Nabi

Sheh ne farmaya uroosi ka hay jora tan par

Ek dulha kay to mai ro chuka tukray chun kar

Mera farzand jawan haye wo mera Akbar

Uski shadi ka tha arman wo mera noor e nazar

Kha kay pal barchi ka rone ko mujhe chor gaya

Apne malboos e uroosi ko kafan tu na bana

Wehab-e-kalbi ne kaha mujhko hay hukme madar

Jaa mere laal tu maidan main dulha ban kar

Tera shehbala hay farzand e Rubab e muztar

Sehra Akbar pe tu Abbas pe tu waar de sar

Teri dulhan koi Kubra kay barabar to nahi

Uska aanchal sar e Kulsoom ki chadar to nahi

Bolay Sheh tu mera mehman hay Wehab-e-kalbi

Le baraat ko tu apni nikal jaa jaldi

Utne wali hay abhi dasht e balaa main aandhi

Mera Allah mubarak kare tujhko shadi

Mai teri laash pe ro'un mujhe manzoor nahi

Aal e Imran hoon mai ye mera dastoor nahi

Wehab kehne laga Imran kay emaan ki qasam

Ab meri rah e shahadat se na paltenge qadam

Aap ko chor kay is dasht main ya Shah e umam

Laut jaun to khafa hongay Rasool e Akram

Parhliya kalma e tuaheed musalman hoon mai

Aap ki ghurbat-o-mazloomi pe qurban hoon mai

Jazba e shauqe shahadat pe Hussain ibn e ali

Bolay aa seene se lag ja mere Wehab-e-kalbi

Muntazir hay dar e jannat pe teray haq kay Nabi

Teray baraati bhi tu bhi hay muqaddar ka dhani

Meri nusrat main agar sar tera kat jayega

Mujhse pehle bhi tu jannat main chala jayega

Wehab-e-kalbi ne kaha khuld nahi hay darkar

Khuld to aap kay qadmo main pari hay sarkar

Aap raazi hay to jannat ki talab hay bekar

Dijiye marne ki ijazat kay ye sar tan pe hay baar

Khuld to aap kay maqtal ko bana dega khuda

Wehab-e-kalbi ka watan aaj se hay karbobala

Milgaya izn e wighan ran main qayamt aayi

Jaun aur Hur ki tarha usne shahadat paayi

Sheh puakre mera maara gaya ek aur bhai

Ghar main Zainab ne udhar farsh e aza bichwayi

Shiddat e gham se chacha karkay Sakina royi

Bola shehzadi na rona lasha e wehab-e-kalbi

Ay raza naar se noori hua Wehab-e-kalbi

Maasiyat dhal gayi jab royi Ali ki beti

Zauja e Wehab se Zainab ne kaha ay bibi

Umr bhar Wehab ki laazim hui pursa dari

Haye rehan bayan kaise karoo wo manzar

Zauja e Wehab ko Zainab ne urhayi chadar