Haye Aseer qafila darbar e sham jab aaya

Yazeed Zainab e Kubra se yun hua goya

Lo aj raaz Wa tu izzu man tasha ka khula

Kay bawaqar hua kon, kon hay ruswa

O bad kalam tehar bolen Zainab e Kubra

Nashay mai mast hay aayat yeh poori sab ko suna

Wo hath khair ka hay kon mujh ko yeh to bata

Kay jis se zilat o toqeer bant’ta hay khuda

Wo hath tu hay k hum wo hath tu hay k hum

Hum ahlebait hain us kay hum he hain izzat o zillat k bantnay walay

Yad e kal khair bhi hum Rab e kaaba ki qasam

Unhi hathon mai rasan sar e darbar e sitam

Zainabi lehjay mai awaz e Ali goonj uthi

Zulm or jabr k darbar par bijli se giri

Laiq e hamd hay jis ne hamain izzat bakhshi

Surah e Rom se shehzadi ne aayat yeh parhi

Jo buray thay so bura he un ka anjam hua

Jis ne Quran ko jhutlaya wo nakaam hua

Kia kaha tu ne kay haq se hamain ruswai mili

Hum yeh kehtay hain hamain izzat o sachai mili

Hum ko Quran mila Rab ki shanasayi mili

Mere pyaro ko sina par bhi pazerayi mili

Ibn e marjana teray jubba o dastar talak

Karbala aagaye ab sham kay darbar talak

Aye mere bhai kay qatil hawas e zar k ghulam

Imtehan yeh bhi hay or mai karun tujh se kalam

Yun mukhatib hun kay dil me hay mere gham ki husaam

Mujh ko dena hay Hussain ibn e Ali ka paygham

Kar kay tazheek e Nabi tujh ko maza aata hay

Inteqam e ohad o badr pe itrata hay

Aye Yazeed ay sitami jaag bohat shaad hay tu

Qaid karke hamain samjha hay kay azad hay tu

Yeh teri khaam khayali hay k aabad hay tu

Nasl dar nasl sada kay liye barbad hay tu

Faisla Rab ka hay mohlat hay sambhal janay ki

Dheel dee jati hay zalim ko sambhal janay ki

Aaj kis zoum mai ashraf ka khoon peeta hay

Kaat kay bagh e Risalat ko tu khush hota hay

Cheekhta phirta hay tu badr ka yeh badla hay

Mujh ko herat nahi hinda he ka tu beta hay

Hoga maloom shaqawat ka nateeja us din

Badla yeh kia hay liya jaye ga badla us din

Kardia qatal hamain tu ne ghalat socha hay

Gosht apna he chabaya hay badan nocha hay

Kia khabar tujh ko kay hum logo ka rutba kia hay

Aal e Imran mai Allah ka yeh waada hay

Shohada surat e Quran sada zinda hain

Wo to wo un kay muhibban sada zinda hain

Haye mehv e herat hun jinhain Rab ne sar afraz kiya

Ilm e Quran diya or yad e kal khair kaha

Ah un bagh e Risalat kay gulon ko masla

Aasteeno se tumhari hay lahoo un ka baha

Pak o pakeeza banaye thay jo khud rab ne badan

Aj sehra mai paray hain wohi be gor o kafan

Aazma lay sitami jag sitam kay harbay

Dekh baqi koi dil mai teray hasrat na rahay

Reh gaya ho jo koi sitam tou wo bhi karlay

Jeet kar har gaye teri hukumat hum say

Fikr e Shabbir to phaylay gi Muhammad ki qasam

Yeh tere bas mai nahi malik o mukhtar hain hum

Hafiz e nehj e balagha ka tha wo roub o jalal

Maut ki khamoshi jesa hua darbar ka haal

Jag utheen bibiyan jo gham se musalsal theen nidhal

Bharay darbar se mazloom khateeba ka sawal

Kalma jis ka parha us ka jigar kat liya

Apne mohsin he kay nawasay he ka sir kat liya

Tum thay nau lakh darinday wo bahattar insaan

Un bahatar mai bhi Asghar sa tha ik tishna dahan

Aisay masoom qasam khata hay jin ki Quran

Haye un pyaso kay hulqoom pe khanjar tha rawan

Tum yeh kehtay ho paye jung Hussain aaya tha

Betio behno ko phir sath mai kyun laya tha

Aye yazeed aj na kyun tujh pe falak toot paray

Tu ne wo zulm kiye jis pe Muhammad roye

Haye namoos e Nabi kucha o bazaar phiray

Dar o deewar sajay kothon se pathar barsay

Shamion hum pe naya ab yeh ghazab kartay ho

Choti Zehra ko kaneezi mai talab kartay ho

Khatam taqreer hui mehshar khamosh utha

Ya Ali ap ki beti ka ajab khutba tha

Murda darbar pe chayi thi khateeba ki sada

Bich gayi Sarwar o Rehan wahan farsh e aza

Bhai kay sir pe nazar Zainab e Kubra ki pari

Jhuk gaye Bali Sakina pe Ali ki beti