Chale jab aakhri ruqsat ko sarwar

Kaha Zainab se ay mazloom khwahar

Zara le aao tum Baqar ko jaa kar

Jab aaya ibne Abid hukm paa kar

Kaha Baqar se Sheh ne gham na karna

kay teray saath hay meri Sakina

Ye meri laadli Sakina..

Ye khud pyasi rahegi dukh sahegi

Magar pyasa tumhay rehne na degi

Ye khud ro kar tujhe rone na degi

Ye raah e shaam main saaya karegi

Tujhe ek pal na choraygi akela

Kaha Zainab se phir ay meri khwahar

Chhinaygi jab tumhare sar se chadar

Tamache kha kay bhi ye meri dukhtar

Kabhi hone na degi tumko muztar

Ye balon se karegi tum pe saaya

Jaga kar ghash se ye Abid ko bolay

Hussain ibne Ali ay laal mere

Jab hongi beriyan pairon main tere

Sitamgar jab tujhe sonay na denge

Karaygi tauq ko ashkon se thanda

Agarche kaan honge uskay zakhmi

Bandhi hongi galay main uskay rassi

Kayi din aur kayi shab ki ye jaagi

Kisi pe dukh na ye zaahir karegi

Har ek pal dhyan rakhegi tumhara

Isay seene pe tum apne sulana

Sar e naiza mera sar na dikhana

Hamari laash pe isko na laana

Na dil iska kabhi Zainab dukhana

Na dekhe zakhmi Akbar ka kaleja

Ali Asghar jo tha chota sa bhaiya

Hai sar uska sina par ye na kehna

Mila hay khaak ka isko bichona

Tarap kar jaan dedaygi Sakina

Bhala dekhaygi kyun Asghar ka lasha

Ye kehkar ro diye khud Shah e waala

Likho rehan us manzar pe noha

Raza jisko parhe qarya ba qarya

Har ek ahle aza ho mehve girya

Kahe maula dua degi hamesha