Hussain jaata hai marne ko ay meri Zainab

Qareeb aa gaya ab waqt e akhri Zainab

Salam tumpe ay baba ki laadli Zainab

Zainab ne kaha kaun hai pardes may mera

Kyun jaate ho tum chhor kay bhaiya mujhe tanha

Zainab ko har ek morr pe tarpayegi dunya

Yaad aoge bhaaiya haye yaad aoge bhaiya

Baad aapke hoga meri ghurbat ka ye aalam

Us waqt ghareebi bhi karegi mera matam

Sadaat ko jab raah may dega koi sadqa

Yaad aoge bhaiya

Yaad ayega bhaiya mujhe armaan tumhara

Tum dekh nahi paye ho Akbar ka jo sehra

Dawaat koi shadi ki madine may jo dega

Yaad aoge bhaiya

Is mah say mansoob thi bhaiya meri khushiyan

Thi sab say bari eid meri teesri shaban

Shaban kay jab chand ko dekhegi ye behna

Yaad aoge bhaiya

Itna tha khayaal aap ko parde ka baradar

Le jaate thay tum raat ko amma ki lahad par

Ab dekhegi Zainab ke khulay sar ko ye dunya

Yaad aoge bhaiya

Kis tarhan bhulaungi mai wo dard ka manzar

Wo sukhay galay par tere chalta hua khanjar

Zainab ko nazar aega jab bhi koi pyasa 

Yaad aoge bhaiya

Deedar bhi hojayega beti kay bahane

Kya shaam kay zindan may aoge sulaane

Soegi nahi jab meri lori say Sakina

Yaad aoge bhaiya

Hota tha takallum yun juda bhai behan say

Jis tarhan koi rooh nikalti ho badan say

Sheh ran ko chale kehti rahi Saniye Zehra

Yaad aoge bhaiya